شروط الاستخدام
آخر تحديث: 20 تشرين الأول 2026
عن هاي الشروط
هاي الشروط بتنظّم العلاقة بين Bloxa Studio وأي عميل بيطلب منا تصميم أو بناء أو تشغيل موقع أو نظام. لما تبدأ مشروع معنا، يعني إنك موافق عليها.
الخدمة
منصمم ومنبني أنظمة حجز وإدارة ومواقع ومتاجر إلكترونية، ومنشغّلها إلك على رابطك الخاص. تفاصيل كل مشروع، زي الأقسام والمميزات وموعد التسليم، بنتفق عليها كتابياً بالرسائل قبل ما نبدأ.
الباقات والأسعار
كل الأسعار بالدولار الأمريكي. كل باقة إلها رسوم تأسيس بتندفع مرة وحدة، واشتراك شهري. الدفع السنوي مقدماً بيعطيك شهرين مجاناً. وأي عرض خاص بيكون مكتوب بالرسائل.
الدفع
ما بتدفع شي قبل ما تجرّب النسخة اللي منجهّزها إلك. إذا وافقت عليها، رسوم التأسيس بتندفع على دفعتين: نص عند الموافقة، والنص التاني عند الإطلاق. الاشتراك بيندفع مقدماً، شهري أو سنوي. طريقة الدفع بنتفق عليها حسب بلدك.
التسليم والتعديلات
منسلّمك النظام بالموعد المتفق عليه، ومنبعتلك رابط تجربه قبل الإطلاق. التعديلات الصغيرة، زي تغيير نص أو لون أو حقل، داخلة بالاشتراك. أما الأقسام أو المميزات الجديدة، فمنبعتلك عرض سعر منفصل قبل ما نبدأ فيها.
الملكية
بياناتك وبيانات زبائنك، وشعارك ومحتواك، إلك. ونحنا منشغّل النظام إلك كخدمة طول فترة الاشتراك.
واتساب والخدمات الخارجية
رسائل واتساب بتنبعت عن طريق منصة WhatsApp Business الرسمية من Meta، وبتخضع لشروطها. كل باقة فيها عدد رسائل شهري، وإذا خلصت قبل آخر الشهر منزيدك حسب حاجتك. ما منكون مسؤولين عن أي توقف أو تغيير بيصير من طرف خدمات خارجية زي Meta أو مزوّد الاستضافة، بس منشتغل نحلّه بأسرع وقت.
الدعم
الدعم بيكون بالرسائل، ومنرد على كل رسالة خلال 24 ساعة.
وقف الاشتراك
بتقدر توقف الاشتراك بأي وقت برسالة. النظام بيضل شغّال لآخر الفترة اللي دافعها، ومنسلّمك نسخة كاملة من بياناتك.
التعديل على الشروط
ممكن نحدّث هاي الشروط من وقت لوقت، ومنبلّغ عملائنا بأي تغيير مهم قبل ما يصير ساري. تاريخ آخر تحديث بيكون دايماً فوق الصفحة.
القانون والتواصل
هاي الشروط بتخضع لقوانين المملكة الأردنية الهاشمية. لأي سؤال، راسلنا على hello@bloxastudio.com.